حمد باری تعالی
کاتب: راسخ کشمیری بتاريخ: August 7, 2009 – 7:01 AMکوئی تبصرہ نہیں
قصرِ نگاہ میں ہے جلوہ مقیم تیرا
یہ بھی کرم ہے مجھ پر چشمِ کریم تیرا
فرشِ رسول پر ہے پیہم نزولِ رحمت
قوسین کا مقدر عرشِ عظیم تیرا
شہرِ نظر میں تیری رحمت برس رہی ہے
مدحت سرا جہاں ہے ربِّ رحیم تیرا
یہ چاند، یہ ستارے، یہ کیف زا نظارے
ہر چیز سے ہے ظاہر حسنِ قدیم تیرا
شاخیں مہک رہی ہیں، غنچے چٹک رہے ہیں
تھامے ہوئے ہے دامن دستِ شمیم تیرا
ارض و سماء میں تیرے بکھرے ہوئے ہیں جلوے
عرفان کاش کرتی عقلِ سلیم تیرا
ہر سمت عام ہے اب تیرے کرم کی نعمت
ہر سُو برس رہا ہے لطف عمیم تیرا
تقسیم کر رہی ہے کب سے گلوں میں خوشبو
دامن مہک رہا ہے کب سے نسیم تیرا
جلتا نہ طورِ موسیٰ، بجھتیں نہ آرزوئیں
جلوہ جو دیکھ لیتی چشمِ کلیم تیرا
اب شوق مدح گو کی اتنی سی آرزو ہے
پیغامِ صد بہاراں بخشے وسیم تیرا
فرزند علی شوق۔ مجلۃ الزبیر
Popularity: 4%
